கொஞ்சம் கவிதையும் நிறைய மழையும்

மேகக் கலனூறிய தீஞ்சுவை மழைக் கள்.

2012-01-06T23:37:00.000+05:30

திக்கின் பயணத்தில்
ஒரு பாகையில்
அவ்வற்புதம் நிகழுமெனச்
சொல்லப்பட்டிருந்தது.

மஞ்சிமம் யாதையும் முத்தமிட
தும்புரு யாழை மீட்டியபடி
நடக்கத் தொடங்கியது
சரற் காலக் காற்று.

அந்தி வண்ணத்தில்
கூதலாடை
போர்த்தியிருந்தது
மாயப் பெரு வெளி.

பூ முத்திரைகள் காட்டி
நடனமாடின
நறுங்கமழ் பச்சை மரங்கள்.

நீளும் தடமெங்கும்
குறு குறு இளஞ்செடிகள்
தோளணைத்துக்
கதைத்துக் கொண்டிருந்தன.

மோக மிஞிறுகள்
வனத்து மலர்களோடு
கழகண்டு மொழி
பேசித் திரிந்தன.

தளும்பித் தளும்பித்
திரண்ட குளத்தில்
காமத்தில் புரண்டன
நீரலைகள்.

மெல்லிதழ் மேலாடை
களைந்து
கிறங்கிக் கிடந்தது
செம்முளறி.

மேகக் கலனூறிய
தீஞ்சுவை மழைக்கள்
நுரைத்துப் பொங்க

குளிர்ந்தினித்த அப்போதில்
அவ்வற்புதம்
நிகழ்ந்தது.

-பி.கு.சரவணன்.

நன்றி : பூவரசி அரையாண்டிதழ்.

"முகில் பூக்கள்" குறித்து தோழி தீபாவின் விமர்சனம்.

2011-10-30T12:41:00.000+05:30

‎"பைட் பைப்பர் ஹார்மோனிகா வாசித்துக் கொண்டு செல்வது போல் அலாதியான அனுபவமாக இருக்கிறது" - தீபலக்ஷ்மி

http://deepaneha.blogspot.com/

விமர்சனத்தைப் படிக்க கீழே உள்ள சுட்டியைச் சொடுக்கவும்
http://deepaneha.blogspot.com/2011/10/blog-post.html

மெல்லப் பூத்து என் விழி மலர்த்தும் வேலிப் பூக்கள்.

2011-10-17T06:50:00.002+05:30

வெளிச்சம்

தீட்டிக் கொண்டிருந்த

அந்திச் சித்திரத்தைப்

பார்த்தபடி

முற்றத்தில் அமர்ந்திருந்தேன்.

கோழியும் குஞ்சுகளும்

தம் நகச் சீப்பு கொண்டு

நிலத்தின் தலை வாரிக்

கொண்டிருந்தன.

பொன் மஞ்சள்

பூக்களைக்

கொய்து வந்தது

இளந்தென்றல்.

வெளியெங்கும் பறந்து திரிந்து

பசும் பாகற் கொடி படர்ந்த

பனையோலை வேலியில்

அழகாய் அமர்ந்தன

தேன் சிட்டுக் குருவிகள்.

மகிழ்ந்து கத்தி

ஞாலம் மறந்து

கோலம் கொஞ்சிப்

பல கதைகள் பேசி

மூக்குரசி மூக்குரசி

முத்தம் கொடுத்தன.

வெட்கம் மேவிய மென் பாகல் இலைகள்

பனை ஓலை நெஞ்சில் முகம் பதிக்க

ஏகாந்தப் பொழுதின் இனிமை கூட்ட

காற்றில் பாடத் தொடங்கின

வேலிப் பனை ஓலைகள்.

களி மிகுந்த இரவாகிப் போனது அன்று.

மறுநாள்

வேலி அணைந்திருந்த

வேரல் கழியேறி

எல் புலரக்

கூவியது

பொன்னிறச் சேவல்.

வெளிச்சம் மலரும்

வைகறை வானத்தில்

ஒளியள்ளி முகங் கழுவி

காற்றுத் துண்டால் துடைத்தபடி

வாசலில் நின்றிருந்தேன்.

அக்கணத்தில்

பூ மொட்டுக்களின் காதில்

பாகற் கொடியின்

பச்சை இலைக் கலாபங்கள்

தவழும் சிறகசைத்துச்

சத்தமின்றிச் சொன்னது,

"புற்றிழந்த அரவமொன்று

அலைந்து ஊர்ந்து

தன் கொடி மடியில்

களைத்துப் படுத்திருப்பதாக"!

நல் அரவத்தின்

ஆழ் உறக்கம்

கலைக்காது

மெல்லப்

பூக்கத் தொடங்கின

என்

விழி மலர்த்தும்

வேலிப் பூக்கள்.

காடெங்கும் ததும்புகிறது காமம்.

2011-09-16T00:30:00.006+05:30

பச்சை வனத்தில் மோகம்

மெய் சூட

கலந்து கிடந்தது

மண்ணும் விதையும்.

மென்தளிர்

இலையாடைகள்

மெல்ல நழுவ

பெரு மரத்திடம்

காதலுடன்

பேசிக் கொண்டிருந்தது

காட்டுக் கொடி.

சலனக் குளத்தில்

நீர்ப் பூக்களின்

அதர மகரந்தங்களை

முத்தமிட்டுக் கொண்டிருந்தது

பொன் தும்பி.

விரல்கள் கோர்த்தபடி

நீல வான மெத்தையில்

கூடல் மொழி பேசி

மௌனித்திருந்த

குளிர் காற்றும் மழை மேகமும்

சட்டெனத் தழுவிக் கொள்ள

பொழிந்த பேரன்பில்

மஞ்ஞைப் பீலிகள் உதிர்ந்த

காடெங்கும் ததும்புகிறது

காமம்.

தாமரைக் குளச் சலனங்கள்

2011-09-09T01:57:00.001+05:30

மௌன மேகங்களைத் தழுவிக் கிடந்தது பூங்குளம்

வண்ணங்களைச் சுமந்தபடி திரிந்தன பட்டாம் பூச்சிகள்

பாறைச் சிதறலொன்று கரையோர நாணற் புதரில்

ஒளியுமிழ்ந்தபடி வெறும் கல்லாகிக் கிடந்தது

முன் தினத்தின் மதியப் பொழுதில் விளையாடிய

சிறுவனின் குறி தவறிய கல்லாய்க் கூட இருக்கலாம்

நிலத்திலும் நீரிலும் ஞானம் தேடியலைந்த தவளைக்குத்

தியானம் செய்யப் போதுமானதாய் இருந்தது அந்தக் கல்

தளும்பும் வட்ட வடிவ வாவியைக் கண்ணெடுத்து அளந்து

வரைந்தபடி வானில் பறந்து கொண்டிருந்தது சிற்றெழால்

பூக்களற்ற அல்லித் தண்டுகளில் நறவம் போல் வழிந்தன

சிட்டுக் குருவிகள் சேந்தி விளையாடிய அமுதத் திவலைகள்

கமல இலைகளில் முத்துச் சிதறலாய் உயிர்த் துளி மின்ன

தாமரைக் குளத்தின் அழகியச் சலனங்கள் வழியாக

அமைதியடைகிறது சலனப்பட்ட சின்னஞ் சிறு மனம்.

பிரிவின் இசை

2011-09-09T01:53:00.000+05:30

முல்லை முகையவிழ்த்து

மெல்லக் கசிகிறது இரவு

திறந்த சாளரங்களின் வழியாக

நெகிழ்ந்து தழுவுகிறது

பூக்களின் வாசனைகளைப்

புணர்ந்த குளிர் காற்று.

அதிரும் தந்திக் கம்பிகளின்

ஊடாகப் பிரிவின் இசையை

மீட்டியபடி பெய்கிறது மழை.

பாடத் தொடங்கும் அவனின்

ஆழ்மனக் குளத்திலிருந்து

எழுந்து வருகிறாள் அவள்.

"முகில் பூக்கள்" குறித்து எழுத்தாளரும் பேச்சாளரும் இயக்குனருமான திரு.பாரதி கிருஷ்ணகுமாரின் விமர்சனம்

2011-06-12T13:26:00.004+05:30

"முகில் பூக்கள்" குறித்து எழுத்தாளரும் பேச்சாளரும் இயக்குனருமான திரு. பாரதி கிருஷ்ணகுமாரின் விமர்சனம் அவரது வலைப் பூவில் http://unmaiputhithandru.blogspot.com

விமர்சனத்தைப் படிக்க கீழே உள்ள சுட்டியைச் சொடுக்கவும் http://unmaiputhithandru.blogspot.com/2011/05/blog-post_31.html

உலகை ஆள வேணும்.

2011-05-05T08:10:00.002+05:30

அக்கா அண்ணன் போல அறிவைத் தேடி நீயும்
துள்ளி ஓடும் கன்றாய் தினம் பள்ளி செல்ல வேணும்
கிள்ளை மொழி பேசும் ஆலங்கிளியைப் போல
அன்னை மொழி பேசி எங்கும் பறந்து திரிய வேணும்
ஆடும் அழகு மயிலாய்ப் பாடும் சோலைக் குயிலாய்
ஆட்டம் ஆடிப் பாட்டுப் பாடி கலைகள் வளர்க்க வேணும்
நன்றாய் மென்று தின்று நல்ல உணவை உண்டு
ஒழுங்காய் உடலைப் பேணி நன்றாய் வாழ வேணும்
அம்மா அப்பா சொல்லைத் தட்டாமல் கேட்டு
என்றும் உண்மை பேசி இந்த உலகை ஆள வேணும்.

குழந்தைகளே குழந்தைகளே எங்கே போனீர்கள்?

2011-04-24T03:29:00.001+05:30

குழந்தைகளே குழந்தைகளே எங்கே போனீர்கள்?
அழகு மரம் பூத்து நிற்கும் வடிவைப் பாருங்கள்
குழந்தைகளே குழந்தைகளே எங்கே போனீர்கள்?
பச்சை இலை பழுத்த இலை நடனம் பாருங்கள்
குழந்தைகளே குழந்தைகளே எங்கே போனீர்கள்?
ஓடியாடி பழம் கொறிக்கும் அணிலைப் பாருங்கள்
குழந்தைகளே குழந்தைகளே எங்கே போனீர்கள்?
குஞ்சுக் காக்கா குயிலாகும் விந்தை பாருங்கள்
குழந்தைகளே குழந்தைகளே எங்கே போனீர்கள்?
மைனாக் கூட்டம் கிளை தாவும் எழிலைப் பாருங்கள்
குழந்தைகளே குழந்தைகளே எங்கே போனீர்கள்?
ஆட்டம் போடும் குருவிகளின் வீட்டைப் பாருங்கள்
குழந்தைகளே குழந்தைகளே எங்கே போனீர்கள்?
பச்சைக் கிளிகள் பேசும் பேச்சை கேட்க வாருங்கள்
குழந்தைகளே குழந்தைகளே எங்கே போனீர்கள்?
உரு மாறி உரு மாறி கதை சொல்லும் மேகம் பாருங்கள்
குழந்தைகளே குழந்தைகளே எங்கே போனீர்கள்?
என் மடியிலமர்ந்து இயற்கைக் காட்சி காணப் பழகுங்கள்
குழந்தைகளே குழந்தைகளே எங்கே போனீர்கள்?
தின்னப் பழம் நிறைய இருக்கு பறித்துத் தின்னுங்கள்
குழந்தைகளே குழந்தைகளே எங்கே போனீர்கள்?
விளையாட நிழல் இருக்கு இங்கே வாருங்கள்.

நிறுத்தங்களில் சில கவிதைகள்...

2011-04-22T02:15:00.004+05:30

செழித்த பசுஞ்செடியில் விரிந்த புது மலர்
பூவாசம் சூழ மெய்யணைக்கும் தென்றல்
அழகு வான் முகிழ்த்த சுடர் பொன் திங்கள்
புத்தொளி புலர்ந்திருக்கும் விடியல் வெளி
கோலக் கடல் எங்கும் எழிற்கோலம் பூண்டு
துள்ளிக் கரை தழுவும் அன்பின் பேரலைகள்
மழையில் உயிர் சிலிர்த்து உடல் நனைந்து
தொடரும் பயணத்தில் உலவும் நெகிழ்மனம்
நிறுத்தங்களில் எழுதிச் செல்கிறது சில கவிதைகளை.

நன்றி : www.poovarashi.com

மழையின் பெயரால் - கவிஞர் மயூரா .

2011-03-31T20:28:00.005+05:30

"முகில் பூக்கள்" குறித்து கனடாவைச் சேர்ந்த தோழியும் கவிஞருமான மயூவின் எண்ணங்கள் "மழையின் பெயரால்".

எண்ணங்களில் நனைய கீழே உள்ள சுட்டியைச் சொடுக்கவும்.

http://thurkamano.blogspot.com/2011/03/blog-post_27.hthml

முகில் பூக்கள் - பி. கு. சரவணன்

2011-03-31T19:56:00.003+05:30

வெளியீடு : தகிதா பதிப்பகம்
4/833 தீபம் பூங்கா
கே.வடமதுரை
கோயம்பத்தூர் - 641017
dhakitha@gmail.com
9443751641

அட்டை வடிவமைப்பு : அனந்த பத்மநாபன்

முதல் பதிப்பு : நவம்பர் 2010
விலை : உரூபாய் 50/-

முகில் பூக்கள் - புத்தக விமர்சனம்.

2011-03-31T19:16:00.004+05:30

கீற்று இணையத் தளத்தில் எனது "முகில் பூக்கள்" கவிதைத் தொகுப்பின் விமர்சனம் படிக்க கீழே உள்ள சுட்டியைச் சொடுக்கவும்.

http://www.keetru.com/index.php?option=com_content&view=article&id=13858:2011-03-30-13-20-20&catid=4:reviews&Itemid=267

காதல் அலைகள்.

2011-02-10T10:28:00.001+05:30

அந்திப் பொழுதில்
ஆழியின் வதனத்தில்
ஆதவன் முத்தம்.
முகிழ்த்த காதலில்
தகித்த மோகத்தில்
சுடர்ப் பொன்னொளி
மின்னித் தழுவ
பெருங்கடலெங்கும்
காதல் அலைகள் .

பிரியங்களைத் தொலைத்த மொழிகளின் யாத்திரையின் போது...

2011-01-06T17:49:00.000+05:30

பெருந்துயர் சேர்ந்து
மனத்துள் நுழைந்து
மென்று தின்று
அகத்துயிர் குடித்து
அனுதினமும் கொன்று
வலிகளை மட்டுமே
பழக்கமாக்கி
கண்ணீரோடும்
மௌனங்களோடும்
பிரிவின் பொழுதுகளில்
யாத்திரை போகிறது
பிரியங்களைத்
தொலைத்த மொழிகள்.
வினையின் செயலென்று
அழவும் மறந்து
வேதனையின் விதையொன்றை
ஊன்றிக் கொண்டிருக்கிறேன்.

காதலில் பெருகும் காமம்

2010-11-23T21:24:00.000+05:30

கோலக் குறுஞ்சிரிப்பும்
கூர்வேல் விழி மொழியும்
ஒயில் மயில் நடையும்
மோனச் சிறுமுகமும்
செந்தூர ஒளி நுதலும்
கார்முகில் கருங்குழலும்
வெண் எயிறும் -தமிழ்
விளம்பும் செவ்விதழும்
அசையும் பொன் தனமும்
மலர்க் கொடியிடையும்
காணும் மகிழ் நெஞ்சில்
பெருங்காமம் பூத்தபடி
காதல் பெருகுதடி.

எங்கள் வீட்டு ஜன்னல்.

2010-10-08T17:04:00.000+05:30

எப்பொழுதும் ஜன்னலுக்கு
எதிரேயுள்ள திண்டில் தான்
குருவிகளுக்கும் காக்கைகளுக்கும்
அம்மா தண்ணீர் வைப்பாள்.

காக்கைகளும் குருவிகளும்
பறந்து விளையாடிய களைப்பில்
தண்ணீர் குடித்துச் செல்லும்.
சில சமயங்களில் பெயர் தெரியாத
பறவைகளும் வந்து போகும்.

ஜன்னல் வழியாக
ஓடியும் நடந்தும்
வம்பிழுத்துக் கொண்டே
இருப்பாள் காற்று.
அவ்வப் பொழுது
வாசனைகளை
பரிசளித்துச் செல்வாள்.

வித விதமாய் கதை சொல்லிப்
போகும் வெண் மேகங்கள்.
அமைதியான மதியங்களில்
கருவேப்பிலை மரத்திலமர்ந்து
குயில் பாடிக் கொண்டிருக்கும்.

மழைக் காலங்களில்
முகத்தில் தெறிக்கும்
சாரலில் நனைந்து கொண்டே
மேசையில் இருக்கும்
புத்தனும் நானும்
மழையை ரசிப்போம்.

இரவில் மேகமும் நிலவும்
கண்ணாமூச்சி விளையாடும்
பொழுதுகளில் மெல்லிசையைக்
கேட்டபடி உறங்கிப் போவேன்.

அதிகாலையில் கிழக்கிலிருந்து
பூக்களையெல்லாம் மலர்த்திவிட்டு
ஜன்னல் வழியாக என்னையும்
எழுப்பி விடுவான் இளம்பரிதி.

மரச் சட்டங்களும்
நீளக் கம்பிகளுமாய்
அழகாக இருக்கும்.
எங்கள் வீட்டு ஜன்னல்.

உதிரும் மழைப் பூக்களும் பூக்கும் மந்தாரைகளும்

2010-10-03T22:06:00.002+05:30

பன்னீர் பூங்கள்ளைக்
குடித்திருந்த காற்றின்
மோகத் தழுவலில்
மயங்கிக் கிடந்தது
பூத்திருந்த நிலம்
பரந்த வெளியெங்கும்
பொன் மெழுகி
கத்தாளம் பூவிலமர்ந்தது
தங்கத் தும்பி
சிறகு விரித்து
வானம் பறந்தன
வண்ணக் கொண்டை
கொண்டலாத்திகள்
மேகச் செடியில்
பூத்திருந்த மழைப்பூக்கள்
உதிரத் தொடங்கின
பூத்தன மந்தாரைகள்.

பூம்பாதிரித் தாழ்வாரத்தில்...

2010-09-26T19:15:00.000+05:30

அந்திக் கடலில்
கருமுகிலைத்
தழுவிக் கிடந்தது
ஒளிச்செம்பரிதி
நெடிதுயர்ந்த பூம்பாதிரி
மர வீட்டின் தாழ்வாரத்தில்
உலாத்திக் கொண்டே
ஏதேதோ பேசிச் சிரித்தன
கொஞ்சும் மைனாக்கள்
பழுத்து உதிர்ந்த
பொன்மஞ்சள் இலையைத்
துரத்திக் கொண்டிருந்தது
பருவக்காற்று
செவ்விதழ் அசைத்து
நாணம் கொண்டது
பாதிரிப் பூ
மேகப் புற்றிலிருந்து
பறக்கத் தொடங்கின
மழை ஈசல்கள்.

மேகம் மழைத் தூரிகை பிடித்து வரைந்த ஓவியத்தில் நான் நனைந்து கொண்டிருந்தேன்.

2010-09-13T19:56:00.001+05:30

பச்சை இலைகளிலும்
வண்ணப் பூக்களிலும்
வெளிச்சம் பூத்திருந்தன
ஈரம் பொழிந்த நிலமெங்கும்
தவழ்ந்து கிடந்த
பிச்சிக் கொடிகளில்
மலர்ந்து கொண்டிருந்தது
நெகிழும் பேரன்பு.
பெருகிச் சுழித்தோடிய
மழையாற்றில்
பொன் சருகுத் தோணிகள்
பயணம் தொடங்கின.
கூட்டுக்குள்ளிருந்து
இலைச் சாளரம் வழியே
அழகிய உலகத்தை
இமை மூடாமல்
பார்த்துக் கொண்டிருந்தது
ஊதாத் தேன் சிட்டு
மேகம் மழைத் தூரிகை பிடித்து
வரைந்த ஓவியத்தில்
நான்
நனைந்து கொண்டிருந்தேன்.

யாரேனும் மொழி பெயர்த்து வையுங்கள்.

2010-09-09T22:37:00.001+05:30

பெருகி ஓடும்
நதியின்
கரையில்
அமர்ந்து
பழுத்த இலையொன்று
பசுங்கிளையில்
வாழ்ந்திருந்த நாட்களைப்பற்றி
காற்றில் எழுதிய
எழுதி முடிக்கப்படாத
குறிப்புகளை
மொழி பெயர்த்துக்
கொண்டிருக்கிறேன்
மலர்க் கண்கள்
திறந்து
பூஞ்செடிகள் துயில்
எழும்
முகை விரிப் பொழுது
நிறங்களால்
விடியும்
அப்பொழுது
என்
இலைச் சிப்பிகளில்
பனி முத்துப்பூக்கள்
பூத்திருக்கும்
கமழ்ந்த வாசனையில்
கிறு கிறுத்த
இளங்காற்று
வண்ணத்துப்பூச்சியாய்
மாறி
சிறகசைத்துப்
பறந்து
ஆடிக் கூத்தாடி
விளையாடிக் களித்திருக்கும்
கிளையமரும்
கருங்குயில்
காதல் பாடல்
பாடும்
சிறு குருவி
கூடு கட்டி
வாழும்
மலை முகடுகளில்
இரவில் தங்கியிருந்த
முகில்கள்
கொக்குகளோடும்
நாரைகளோடும்
பயணம் செய்து
மழையாய் பொழிந்து
உயிர் சிலிர்க்க
உடல் நனைக்கும்.
--------------------------------
--------------------------------
----------------------------------
---------------------------------
குறிப்பு

பழுத்த இலை
எழுதி வைத்திருக்கும்
மிச்சக் குறிப்புகள்
காணக் கிடைத்தால்
நான்
இல்லாமல் போனாலும்
யாரேனும்
மொழி பெயர்த்து வையுங்கள்.

முகில் குடை

2010-08-31T20:12:00.002+05:30

வெயில் சந்தனம் பூசியிருந்த அழகான மாலைப் பொழுதில்
ஒளிச் சுனையில் ஊற்றெடுத்தன வானமெங்கும் வண்ண நதிகள்
பச்சைப் பீலிகளின் குழு நடனத்தில் லயித்திருந்தது மரகதப் புறா
மென் காற்றின் நீரலைக் கவிதைகளை வாசித்துக் கொண்டிருந்தது
தடாகத்தில் மலர்ந்திருந்த வெண் அல்லியும் நீலத் தாமரையும்
வேர்பிடித்திருந்த பதியனிட்ட செடியில் இலையொன்று துளிர்த்திருந்தது
ஊசித் தட்டான்களோடும் பட்டாம் பூச்சிகளோடும் மகிழ்ந்து குலாவி
முகில் குடை பிடித்து வந்து கொண்டிருந்தது குளிர் மழைக்காற்று.

மயிற்கொன்றை மரத்தினடியில் உனக்காகக் காத்திருந்தபோது...

2010-07-17T18:57:00.003+05:30

விடியற் காலையிலிருந்து பெய்த மழை சற்று ஓய்ந்திருந்தது
ஒளி சிந்தி அசைந்தன பச்சை இலைகளும் வண்ணப்பூக்களும்
நெகிழ்ந்து இளகிக் கிடந்த மண்ணில் பெருக்கெடுத்த புனலாய்
மிகவும் களித்தோடிக்கொண்டிருந்தது நிறம் கொண்ட மழை நீர்
கூவிக்குதித்து கும்மாளமிட்ட குழந்தைகளின் ஆனந்தக்குதியலில்
வெண் முத்துக்களாய் தெறித்துச் சிதறி தூறின மழைக் குளங்கள்
அடை மழையில் நனைந்த கருங் குயிலொன்று நுணா மரத்தின்
நுனிக்கிளையில் அமர்ந்து அங்குமிங்கும் பார்த்துக் கொண்டிருந்தது
கிளிகளும் தாரிச்சிட்டுகளும் பட்டாம் பூச்சிகளும் கொக்குகளும்
நாரைகளும் வானம்பாடிகளும் சிறகு விரித்து பறந்து சென்றன
மேகத் திரைச் சீலைகள் ஒதுக்கி வாசல் திறந்தது நீல வானம்
நீயும் நானும் அமர்ந்து பேசிக்கொண்டிருக்கும் மயிற்கொன்றை
மரத்தினடியில் உனக்காகக் காத்திருந்தபோது இலைகளோடு
அழகழகாய்ப் பூத்திருந்த மழைத்துளிகளை உதிர்த்தவாறு
இளங்காற்றில் வானவில்லை வரைந்தபடி வந்துகொண்டிருந்தாய்...

மேக விறகுகள்...

2010-07-14T09:11:00.002+05:30

யார்
மேக விறகுகளைப்
பற்றவைத்தது?

சிறு
பொறியாய்
தூறிய
மழை
தீயாய்
பெய்கிறது...

பொன்னந்தியில் பெய்த மழை...

2010-07-07T21:50:00.004+05:30

அழகாய் தத்தித் தத்தி தாயின் விரல் பிடித்து
ஒயிலாய் நடந்து வரும் சிறு குழந்தையாய்
வான வெளியில் நடந்து வந்தன மேகங்கள்
உள்ளம் மகிழச் செய்த குளிர் மழைக் காற்றில்
பூக்களும் இலைகளும் பொழியத் தொடங்கின
பசுந் தங்க நிறத்திலடித்த வெயில் மறைந்து
பொன்னந்தி வரைந்த வண்ணத் தீற்றல்கள்
பரிதியின் பிரிவில் கடும் பசலை கண்டு கறுத்து
நிலமெங்கும் பரவி திசை மறைத்து நிற்க
திகைத்த கொண்டல்கள் அதிர்ந்து இடியென
இடிக்க வெளிச்ச மின்னல் கோல் ஊன்றி
மரங்களின் வேர் மகிழப் பெய்தது மழை...

மழைப் பரல் முல்லை

2010-07-05T18:15:00.001+05:30

தளிர் இலைகள்
சிறகசைத்த
இளங் கொடியில்
வான் மகளின்
மேகச் சிலம்புகள்
கழன்று விழ
மழைப் பரல்கள்
முல்லைப் பூவாய்
தெறித்துப் பூத்தன.

களி பொங்கிய பெருமழைப் பொழுதில்...

2010-06-14T00:36:00.002+05:30

நீலக் கம்பளம் விரித்த வானெங்கும்
கூர்வேல் கொண்ட புரவிப் படையென
விரைகின்றன அழகிய வெண்மேகங்கள்
களம் ஆடும் மற வீரர்கள் வாள் வீசி
கடுஞ் சமர் புரியும் பெரும் ஓசையொத்து
கருமேக யானைகள் சூழ்ந்த பொழுதில்
அண்ட வெளியெங்கும் பிளிறின இடிகள்
தந்த மின்னல் ஒளிரப் பெய்த பெருமழையில்
காற்றோடு களி பொங்கப் பெருங்கூத்தாடுகின்றன
மரங்களும் புத்திலைகளும் நறுமலர் பூக்களும்...

அம்மாவென்றழைக்கிறது மழலை...

2010-05-16T01:44:00.001+05:30

நெடுந்தொலைவு பயணித்து நீர்க்குளத்தில் இறங்கி
ஆயிரத்தில் மூன்று சதமாய் விதையொன்று துளிர்க்க
கொடி வழியே சுவாசித்து அரும்பிப் பூக்கிறது உயிர்ப் பூ
மெல்லுடல் விரித்து அலையென அசைகிறது பேரழகு
நாளங்கள் தாரங்கள் இசையில் உயிர் நீர் பெருக்கெடுக்க
தாளம் தட்டத் தொடங்குகிறது செந்தாமரை இதயம்
குமிழ் பவழ இதழொடு இரு செவியும் நாசியும் தோன்ற
முகையவிழா சிறு மொட்டென குவளைக்கண் பூக்கள் மலர
செம்பிஞ்சுக் கை கொண்டு வாழைத்தண்டுக் கால் கொண்டு
அன்பின் குழைவில் அம்மாவென்றழைக்கிறது மழலை
மேடிட்ட வயிற்றில் மெதுவாய் கை தொட்டு மெய் சிலிர்த்து
நெகிழ்ந்து மகிழ் உணர்வில் பேரின்பம் அடைகிறது தாய்மை.

சித்திரை மழை...

2010-04-29T19:54:00.002+05:30

செந்தளிர் இலைகள் துளிர்த்த வேம்பில்
மலர்ந்து சிரித்தன கவின் வெண் பூக்கள்

அணில்கள் விளையாடும் மரக்கிளையூடி
ஒளிர்ந்து விரிந்தன வைகறைக் கதிர்கள்

புங்கை மரத்தின் சிறுகிளை மீதில் சிறகுகள்
பரத்தி சிலிர்த்து அமர்ந்தது செம்பூத்தொன்று

நனிமகிழ்ந்து பறந்து முள் மரங்கள் தோறும்
கூத்தாடித் திரிந்தன தூக்கணாங்குருவிகள்.

நீர்நிறை குளத்தில் துள்ளிய கெண்டைகளின்
ஆடல் கண்டு தாழத் தவழ்ந்தது கூழைக்கடா

நெடுங்கால் பதித்து நீள் வண்ண அலகால்
கயலினைத் தின்றன வலசைப்பறவைகள்.

சித்திரை வெயிலில் மழைக்கதை கதைத்து
மழைச்சித்திரம் வரைந்தன எழில் முகில்கள்.

தாண்டவ மழை...

2010-04-28T23:41:00.014+05:30

பெருமரங்களின் விரிந்த கிளைகளிலிருந்து
பூத்திருந்த பொன்னிலைகள் உதிரத் தொடங்கின
கிள்ளை நிறம் இழந்து சுட்டெரிக்கும் வெம்மையால்
வண்ணம் மாறிய நிலமெங்கும் சுற்றிச் சுழன்றடித்த
சூறைக்காற்றில் துடி கொண்டது அந்திவானம்
வெளியெங்கும் வெளிச்ச மின்னல்கள் விளக்கேற்ற
கருங்கொண்டலின் காதலில் பிறந்தன இடிகள்
கடற்புறத்தெங்கும் பனை இலைகள் பறையடிக்க
ஒற்றைக் கால் தூக்கி வல்லான் ஆடிய ஊர்த்துவ
தாண்டவமாய் மண் அதிரப்பெய்தது ஆலங்கட்டிமழை

நொடி மரணம்...

2010-04-27T10:12:00.001+05:30

சீழ் பெருக்கி செங்குருதி வழிந்தோடும்
ரணம் அல்ல மரணம்
பிறந்தவரை மறக்கச் செய்து
உயிர்த்தாமரை மடியும்
நொடிக்கணத்தில் பூக்கும் மகா ரணம்.

நொடிக்குள் மென்தசை தளன்று
காற்று பிரிந்து உயிர் வெப்பம் உதறி
காலனின் கலமாய் பிறப்பெடுக்கிறது.

சடலத்தைத் தீ தின்னுமோ
சாம்பலை மண் தின்னுமோ
உயிரை வான் தின்னுமோ!

யார் அறிவார் நொடி மரணம்?

உயிர் உந்த உடல் நடுங்க
நாடியடங்கி மாயம் காட்டும்
மரணம் காண பயணம் தொடர்ந்தேன்!

மன விழிகள் விரிய
உயிர்த் தாமரை ஒளிர
காயத்துள் மாயமாய்
பூத்திருந்தது மரணப்பூ.

மெய் கண்ட மெய் சொல்ல
மாயாற்புதம் மரணம் வெல்லும்
வழியுரைக்க முற்பட்டபோது

நொ..டி..ம...ர...

வனைவோம் புது மனிதனை!

2010-04-24T17:39:00.001+05:30

ஒ மனிதா!

யார் நீ? உனது ஆதி எது அந்தம் எது?
பிஞ்சாய் இருக்கும் போதே நஞ்சை அறுத்த பின்பும்
பிண்டம் பெரியதானதும் நஞ்சாய் ஆவதேனோ!

நீரில் பிறந்து நெருப்பில் அழிகிறாய்!
அண்டத்தில் இந்தப் பிண்டத்தால் எத்தனை மாற்றம்!
நீ சதைப் பிண்டமா இல்லை அணுக் குண்டமா?

விதையாகி விருட்சமாகி பின் மீண்டும் விதையாகி
புரியாத புதிராய் பெருகி நிற்கிறாய்! - நீ
இயற்கையா இல்லை இயற்கையால் விளைந்த செயற்கையா?

ஆடுகிறாயா இல்லை ஆட்டுவிக்கப்படுகிறாயா?
உயிராய் உடலாய் உள்ளிருக்கும் எலும்பாய்
அன்பாய் அறிவாய் ஓங்காரமாய் எங்கும் இருக்கிறாய்!

ஆக்கமும் அழிவும் தொழிலாகிவிட்ட இந்த நேரத்தில்
மனித மூலாதாரத்தைத் தேடுவோம்!

தேடல் தொழிலாகிவிட்டது தேடுவோம் மூலத்தை
மூலம் தெரிந்து வனைவோம் புது மனிதனை!

வதம் செய்யும் தேவதை...

2010-04-20T18:46:00.002+05:30

முகம் மறைத்தன
மருதாணி விரல்கள்
விழிகள் பேசின
காதல் மொழிகள்...

செங்காந்தள் விரல்கள் விரித்து
பூங்கூந்தல் அள்ளி முடிந்து
நுதல் விழிச் செந்தூரம் ஒளிர
பொன் முகம் காட்டினாய்!

யாரடிப் பெண்ணே நீ !

மஞ்சள் குளித்த முகம்
நெஞ்சில் நிறைந்த கணம்
பொன் கழஞ்சுகள் சிதறிய இசையாய்
நீ சிரித்தாய்
இல்லை இல்லை
இசைத்தாய்...

பொழியும் மழையாய்
இதயம் நிறைந்தாய்
கருத்துள் நுழைந்து
காதலாகிப் போனாய்!

நீ
என்
தேவதை...

வதம்
செய்யும்
தேவதை...

காடுகள் நிறைந்த மனம்...

2010-04-07T21:57:00.002+05:30

தரு நிறை வனத்துள்
தளும்பிச் சுழித்து
நெகிழ்ந்தோடுகிறது
வெண்துகில் ஓடை

தத்தி தவழ்ந்து
சிறகு குவித்து
மோனத் தவம் புரிகின்றன
தட்டாரப் பூச்சிகள்

முதுகு நாணி
முன்னங்கால்கள் தூக்கி
சிலையென சமைந்து நிற்கிறது
பாறையில் பச்சைத் தவளை

விழியிரண்டால்
பெரு வெளி வியந்து
பேரணியாய் விரைகின்றன
கணுக்கால் எறும்புகள்

நறுமலர் தேடி நறவம் எடுத்து
களிநடம் புரியும் தேனீக்களின்
பூந்துகள் தூதில்
சூல் கொள்ளும் பூக்கள்
மலர்ந்து சிரிக்கின்றன

காடெங்கும் வேழம் முறித்த
மூங்கிலின் பச்சை வாசனை
ரீங்காரமிட்டு களிற்றினைப்
பின்தொடர்கின்றன நுளம்புகள்

உயிர்கள் நிறைந்த அற்புதக்கூட்டில்
வெளிச்சம் சிந்தி
பயணம் போகிறது
காடுகள் நிறைந்த மனம்...

பெய்யட்டும் பெருமழை...

2010-03-25T09:37:00.003+05:30

மிகுந்து நிறைந்திருந்தது வெயில்
மலர்ந்த பூக்கள் வாடிச் சுணங்கின
நர்த்தனம் நிறுத்தின இலைகள்
உயிர்க் காற்றின் வெப்பத்தில்
உறைந்து தளர்ந்து கிடந்த உடலெங்கும்
நடுங்கிப் பயணித்தது செங்குருதி.
நிலமெங்கும்ஊறித் திளைத்துக் களிக்க
நெடும்பயணம் புறப்பட்டன மழை மேகங்கள்
காத்துக் கொண்டிருக்கிறது கண்மலர் பூத்த மனம்
பெய்யட்டும் பெருமழை...

முகில் திரள் பொழுதில்...

2010-03-16T03:57:00.005+05:30

பெருங் கடல் வெளியில்
முகில் திரள் பொழுதில்
வண்ணம் கொண்டது
மணற் தீரம்...

நங்கூரமிட்ட
நாவாய்க்கலன்கள்
நர்த்தனம் ஆடிய
அலைவாய்க் கரையில்

*நித்திலம் பூக்க
சிப்பிச் செடிகள்
நீந்திக் கிடந்தன
திரை கடலெங்கும்...

குறுங்கால் நண்டுகள்
கோலமிட
அழகிய ஆமைகள்
ஓடு புக

கண்டங்கள் நடுங்க
அண்டங்கள் அதிர
வளி மண்டலம் கிழித்து
முழங்கின இடிகள்!

கைநொடிப் பொழுதில்
பேராழியில் மூழ்கிக் கிடந்த
சங்கினுள் புகுந்தது
அலையோசை...

திசைகளெங்கும்
மின்னல்கள் மின்ன
வானம் எழுந்தன
கடலலைகள்...

திரண்ட அலைகள்
கரை கடக்க
பெருமழை பெய்தது
கடற்புரத்தில்...

*(மேகம் திரளும் பொழுதுகளில் சிப்பிகள் (கிளிஞ்சல்கள்) கடல் அலையின் மேற்பகுதிக்கு வந்து காத்திருக்கும் . மூடியிருக்கும் கிளிஞ்சல்களுக்குள் மென்மையான ஆய்ஸ்டர் எனும் உயிரினம் இருக்கும். கிளிஞ்சல்கள் திறந்த நிலையில் முத்துச்சிப்பிகள் மழைத்துளிக்காகக் காத்திருக்க அதனுள் மழைத்துளி விழுந்த உடனேயே கிளிஞ்சல்கள் மூடிக் கொண்டு கடலின் ஆழமான பகுதிக்குள் சென்று விடும். அங்கு காதலில் விழுந்த மழைத்துளியும் ஆய்ஸ்டரும் கூடிக் களிக்க நித்திலச் சிரிப்போடு முத்துப் பெண் பிறக்கிறாள். பின் நங்கையர் கழுத்தில் நகைக்கிறாள்.)

முத்து மழை பெய்த பொழுது...

2010-03-14T12:02:00.007+05:30

கருக்கிருட்டில்
தளும்பி நின்றது
பச்சைக் குளம்...

நிலவின் ஒளியில்
குளித்த கல்லொன்று
எறிந்தேன்...

வளையங்கள் தோன்ற
முத்து மழை பெய்தது...

எறிந்த கல்
பூத்து ஒளிர்ந்தது
அல்லியாய்...

மூங்கில்கள் பூத்த யானைகள் காடு...

2010-03-09T12:29:00.007+05:30

குறிஞ்சிப் பூவில் தேனெடுத்து
குலையாய் வாழ்ந்திடும் தேன் வண்டு...

கிளைகள் தோறும் குந்திக் குந்தி
பல(ழ) மரங்கள் தாவிடும் கருமந்தி...

முட்களை உதிர்த்திடும் முள்ளம் பன்றி
சிறு கிழங்குகள் தோண்டி விளையாடும் பன்றி...

விரிந்த வானம் பறந்திட இருந்தும்
வந்திடும் புள்ளினம் களித்திடும் தினமும்...

உதிர்ந்திடும் இலைகள் பூக்கள் சருகுகளாகி
மக்கிடும் மண்ணில் புழுவும் பூச்சியும் பற்பல உண்டு!

இத்தனை நிறமா பச்சையில் என்று
இலைகள் உண்டு வனப்பேச்சி வீட்டில்...

மஞ்சு தவழ்ந்து வரும் கொண்டல்கள் கூடி வரும்
பொழிந்திடும் மாமழையும் மண்ணோடு மெய்கலக்கும்...

ஊற்றெடுக்கும் சுனை நீர் ஓடையாகி ஓடிவரும்
ஓடிவரும் ஓடையெல்லாம் நதியாகப் பிறப்பெடுக்கும்...

பிறப்பெடுக்கும் நதியெல்லாம்
தவழ்ந்து எழும் அருவியாக...

தவழ்ந்து எழும் அருவியெல்லாம்
ஆறாகப் பெருக்கெடுக்கும்...

பெருக்கெடுக்கும் ஆற்றினிலே
வாய் பிளக்கும் முதலைகளும்
துள்ளி விளையாடும் மீன்களும்
நீந்திவரும் அழகாக...

ஓடிடும் அணிலும் ஆடிடும் மயிலும்
பாடிடும் குயிலும் வாழ்ந்திடும் நாடு
கீரியும் பாம்பும் கிளர்ந்தெழும் காடு...

வண்ணப் பூக்கள் பூத்திடும் காடு
கொடிகள் செடிகள் நிறைந்திட்ட காடு

உறுமும் வேங்கைகள் உலவும் காடு
மருளும் மான்களின் அழகிய வீடு

நயந்திடும் நரிகள் திரிந்திடும் காடு
ஒளிந்திடும் முயல்களின் உல்லாசக் கூடு

இது உயிர்கள் வாழ்ந்திடும்
மூங்கில்கள் பூத்த
யானைகள் காடு...

காடுகளை அழிக்காதீர்...

மழையின் ராகம்...

2010-02-04T23:10:00.007+05:30

கருத்த மேகம்
நிறைந்த வெளியில்
மின்னல் தோன்றிய
ஒரு சிறு பொழுதில்

சிரித்த தாமரை
சிந்திய ஒளியில்
பச்சை இலையில்
தக திமி தாளம்...

தாவிக் குதித்த
தவளையொன்று
மழையின் ராகம்
என்ன வென்று
கெண்டை மீனின்
காதில் கேட்டது...

கெண்டை மீனோ
மழையின் ராகம்
குளமே அறியும்
நீயே கேளேன்
என்றே சொல்லி
துள்ளிக் குதித்து
குளத்தில் மறைந்தது...

மோனத் தவத்தில்
இருக்கும் குளத்திடம்
எப்படி கேட்பது
மழையின் ராகம்?

( மழையின் ராகம் அறிய வேண்டி தாவித்தாவி சத்தமிட்டு இப்பொழுதும் குளத்தைச் சுற்றுகின்றன தவளைகள்)

பெருமழை நிறைத்து...

2009-11-10T16:55:00.006+05:30

சரக்கொன்றை பூத்து
வாசல் நிறைந்திருந்த
ஒரு மாலை வேளையில்
கிணற்றின் மேல் கம்பியில்
டிங் டங் டிங் என மெல்லிசையை
வாசித்துக்கொண்டு இருந்தன
கரிச்சான் குருவிகள்...
தோட்டத்தில் பூத்திருந்த பாரிஜாதம்
நொடிக்கொரு தரம்
திரும்பி பார்த்துக் கொண்டே இருந்தது...
காற்றுடன் பேசிக்கொண்டே இருந்தன
தென்னை மரத்தின் கீற்றுகள்...
ரசித்துக் கொண்டிருக்கிறது மேகம்
பெருமழை நிறைத்து...

பூ மழை...

2009-08-20T19:01:00.003+05:30

மழையில் மகிழ்ந்தாடுகிறது மல்லிகை
மனசெங்கும் வாசனை...
மழை வாசனையும்
பூ வாசனையும்...

வழித்துணை...

2009-05-26T10:46:00.008+05:30

யாருமில்லாமல்

தொடங்கிய பயணத்தில்

அந்த அழகிய ஊரில்

பெய்யத் தொடங்கிய மழை

வீடு வரை வந்தது...

மீறல்...

2009-04-19T14:01:00.004+05:30

நீ பாதி நான் பாதி என நகர்ந்த பொழுதின்
சத்தியம் மீறி
பெரும் பொழுதாய் நீண்டு கிடந்தது பகல்.
இலையுதிர்ந்து நிறமிழக்கத் தொடங்கி இருந்தன மரங்கள்
நிறை கிணறுகள் தன் பெயர் தொலைத்து நின்றன
வெடித்துப் பிளந்த நிலங்கள் செடிகளை உண்ணத் தொடங்கின
உயிர்களின் சுவாசப் பைகளில் மட்டுமே மிச்சமிருந்தது காற்று
பொறுப்பது பேதமையென பொங்கியெழுந்த இரவு
பகலின் மீது போர் தொடுத்த வேளையில்
கொட்டத் தொடங்கியது மழை...

அப்பாவின் தோழி வாங்கிக் கொடுத்த ஹார்மோனிகா...

2009-02-17T08:44:00.008+05:30

பூக்களை நனைத்துக் கொண்டிருந்த
ஒரு மழை நாளில்
அப்பாவின் தோழி வாங்கிக் கொடுத்த
ஹார்மோனிகாவை முதன் முதலில்
வாசித்த பொழுது
வண்ணத்துப் பூச்ச்சியை
துரத்திச் செல்லும் சிறுவனைப் போல
பாய்ந்து சென்றது எனது இசை...
அழகா வாசிக்கிறடா என்றாள் அக்கா
கட்டியணைத்து முத்தமிட்டாள் அம்மா
நானும் உன்னை மாதிரி வாசிக்கிறேன் என்றான் தம்பி
அப்பா மட்டும் எதுவும் சொல்லவே இல்லை...

காதல் மழை...

2008-11-20T14:09:00.007+05:30

பால் வெளியில்
ஒரு வானமும் ஒரு நிலமும்
காதலிக்கத் தொடங்கின...

ஒன்றை ஒன்று
பார்த்துக் கொண்டே இருந்தன...

பெருகிய காதலில்
வானம் வண்ணம் கொண்டது...
நிலமோ பூத்துக் குலுங்கியது...

காலம் இப்படியாக
சென்ற ஒரு வெளியில்
பெரு ஊழியின் சூழ்ச்சியில்
பிரிந்தனர் காதலர்...

பசலை பெருக்கி
நிறம் தொலைத்து
நெடு நாட்கள்
தவித்தது நிலம்..

வண்ணம் தொலைத்து
வாடி நின்றது
வானம்...

பிரிவின் துயரம்
பெரு நோயாய்
வருத்த
நிறம் இழந்த வானம்
நீராய்
நிலம் புகுந்தது...

நீண்ட பிரிவின்
சந்திப்பில்
அணைத்துக் கொண்டனர்
காதலர் இருவரும்...

காதற் பெருக்கில்
நிறம் கொண்டன
நிலமும்...வானமும்...

எங்கும் வண்ணங்கள்...

அங்கு
அவனும் அவளும்
பார்த்துக் கொண்டனர்...

வண்ணமும் வனப்புமாய்
வானமும் நிலமும்

அண்ணலும் நோக்க
அவளும் நோக்க

காதல் மழை
பெய்யத்தொடங்கியது...

அழகாய் மாறிப் போனது
இவ்வுலகம்...

காற்றின் முத்தமும் பெருமழையும்...

2008-11-20T13:38:00.004+05:30

வாரி அணைத்து
உச்சி முகர்ந்த தாயாய்
காற்றின் முத்தம்...
ஈரம் உணர்ந்த
ஒரு பொழுதில்
பெய்யத் தொடங்கியது
பெரு மழை...

அன்பிற்கும் உண்டோ
அடைக்குந் தாழ்...

முதல் மழையாய்...

2008-11-16T18:26:00.008+05:30

யாவருக்குமான மழை
ஒவ்வொருவருக்கும்
ஒரு விதமாய் !

எனக்கு மட்டும்
முதல் மழையாய்...

அன்று ஒரு புதன் கிழமை...

2008-10-27T12:31:00.013+05:30

அன்று ஒரு புதன் கிழமை

அடைமழைக் காலம்

மழை பெய்து ஓய்ந்திருந்த மாலை நேரம்

சாலையெங்கும் பூத்துக் கிடந்தன மஞ்சள் மலர்கள்

பர்தா அணிந்த பெண்ணொருத்தி

கடந்து சென்ற பேருந்தின் அடைத்த சன்னல்

திறந்த ஒரு இமைப் பொழுதில்

வெளிச்சம் சிதறி வானவில் ஆனது...

காகிதக் கப்பல்...

2008-10-18T23:40:00.006+05:30

மூக்கு கண்ணாடியை சரி செய்து கொண்டே
காகிதத்தை மடித்து அப்பா கப்பல் செய்யத் தொடங்குவார்
அம்மா சுடச் சுட தின்பதற்கு ஏதாவது செய்து தருவாள்
தம்பி ஜன்னல் கம்பியை பிடித்துக் கொண்டு
தெறித்து விழும் மழை நீரை கையில் சேந்தி விளையாடுவான்
சாதா கப்பல் மட்டுமே செய்யத் தெரியும் அப்பாவுக்கு
அம்மா தான் கத்தி கப்பல் செய்து கொடுப்பாள்
பக்கத்து வீட்டு சுமதியும் மாடி வீட்டு கதிரும் நானும்
பெருகி ஓடும் மழை நீரில் கப்பல் விடுவோம்.
மகிழ்ச்சியை சுமந்து கொண்டு பயணம் போகும்
எங்கள் காகிதக் கப்பல்...

ஆனந்த தாண்டவம்...

2008-09-27T12:12:00.005+05:30

பச்சை பூத்திருந்த மழைக் காடு

மினு மினுத்த கருப்பு மண்ணில்

ஆடல்வல்லானின் அழகிய காலில்

சிக்குண்ட முயலகனாய்

வண்ண மயிலின் வனப்பு பிடியில்

படையும் நடுங்கும் பாம்பின் நடனம்

விரித்த தோகையின் ஆயிரம் கண்களிலும்

உமையின் உக்கிரம்...

கொண்டல்கள் கூடிய கொற்றவை காட்டில்

அகவும் மயிலின் ஆனந்த தாண்டவம்...

அது நிகழ்ந்த பொழுது...

2008-09-21T14:29:00.003+05:30

அது நிகழ்ந்த பொழுது

பூக்களின் வாசனை

எங்கும் நிறைந்திருந்தது

காற்றின் இசைக்கு

இலைகள் பாடிக் கொண்டிருந்தன...

சட்டென்று அது நிகழ்ந்தது.

முகம் மறைத்து

பெண்கள் இடம் நகர்ந்தனர்

இயல்பாய் நடந்தவர்

கலவரத்துடன் விரைந்தனர்

மகிழ்ச்சி வெறுப்பு கோபம் என

ஒவ்வொருவரும் ஏதாவது ஒன்றை

அங்கே விட்டுச் சென்றனர்...

என் உதடுகளை முத்தமிடத் தொடங்கிய மழை

இப்பொழுது முழுவதுமாக

என்னை ஆக்கிரமித்துக்கொண்டது...

மழையின் பாடல்...

2008-09-19T23:11:00.020+05:30

மேகங்கள்
கடந்து போன பின்பும்
இலைகளைப் போலவே
மழையின் பாடலை
பாடிக்கொண்டிருக்கிறது
மனசு...

மழைக் காலம்

2008-09-19T23:11:00.019+05:30

ஈரம் மிகுந்த

காற்று

மழையின் வரவைச்

சொல்லியது...

மழையோ

நாம் நனைந்த

மழை நாட்களை

நினைவு படுத்தியது...

மழைக் காலம் - நம்

நினைவுகளின் காலம்...

மழையிடம்...

2008-09-19T23:11:00.015+05:30

சட்டென்று அனைத்து
முத்தமிட்ட
மழையிடம் சொன்னேன்
உனக்கும்
எனக்கும்
மழையை
மிகவும் பிடிக்குமென்று...

ரசிக்கவும்... நனையவும்...

2008-09-19T23:11:00.014+05:30

மேகமும் மழையுமாய்
நான்
கடல் கடந்தும் வருவேன்...
நீ ரசிக்கவும்
நனையவும்...

இன்னும் பெய்து கொண்டிருக்கிறது மழை...

2008-09-10T23:18:00.005+05:30

மேகங்கள் கூடி

உன்னை வரையத் தொடங்கிய

ஒரு பொழுதில்

பெய்யத் தொடங்கியது மழை...

செடிகள் புதிதாய் பச்சை வண்ணம்

எடுத்து பூசிக்கொண்டன...

பூக்கள் பூக்கத் தொடங்கின...

செம்பருத்தியும் இன்ன பிற பூக்களும்

சிவப்பு நீலம் மஞ்சள் ஊதா வெள்ளை என

வண்ணங்களை எடுத்து அப்பிக் கொண்டன...

அன்பின் ஊற்றில் மனிதர்கள் தோன்ற

மகிழ்ச்சி பெருகியது...

நீராலான இவ்வுலகம் அழகின் வசமானது...

இன்னும் பெய்து கொண்டிருக்கிறது மழை....

முழுவதுமாக...

2008-08-27T11:39:00.005+05:30

அவன் அவனுக்கே அந்நியமானவன்
பெயர் தெரியாததால் அவனை
"பைத்தியம் " என்றார்கள்.
பிறந்தது முதல்
சுதந்திரமாகத்தான் உள்ளான்-அம்மா
யாரென்று அறியாததால் அம்மணமாய்!
ஆதரவாய் யாரும் வந்ததில்லை
"ஈக்களைத் தவிர "!
அதுவும் அவன் புண்களைத் தேடி!!!
கழிவுகள் அவனைக் கழுவின-அவன்
குப்பைத் தொட்டியைக்
குடிலாக்கிக் கொண்டான்.
தெருவைச் சுற்றுவதை
தொழிலாக்கிக் கொண்டான்.
கல்லடி படும் போதும்
வயிறு பசிக்கும் போதும்
மட்டுமே அவன் வாய் வலிக்கும்
"அவனுக்கே தெரியாமல்"!
அன்று இரவு சுதந்திரமானவன்
தூங்கப் போனான்.
அடுத்த நாள் அவன் எழவில்லை.
யாரோ சொன்னார்கள்
"பைத்தியம் செத்துவிட்டது" என்று!
அன்று தான் அவன் நகராட்சிக்குத்
தெரிந்தான் " பிணமாய்"
சுதந்திரமானவன் போர்த்தப் பட்டான்
முழுவதுமாக!

நனைந்து கொள்ளுங்கள்....

2008-08-27T11:21:00.008+05:30

என் அன்பினைச் சுமந்து வருகின்றன
மழை மேகங்கள்...
நனைந்து கொள்ளுங்கள்...

சுகம் சுகம் சுகம்...

2008-08-26T20:27:00.007+05:30

பயணம் சுகம்.

மேகம் தொடர்ந்து வர மலைப் பயணம் சுகம்.

மழை சுகம். புல் நுனிப் பனி சுகம். சில்லென்ற காற்று சுகம். சிரிக்கின்ற பூக்கள் சுகம். சாரல் மழை சுகம். மழை நனைத்தல் சுகம். மழையில் நனைதல் சுகம். அருவியில் குளித்தல் சுகம். மனசுக்குள் பாடல் சுகம். ரசித்தல் சுகம். அதை உணர்தல் சுகம்...

சுகம் சுகம் சுகம்...

நீ சுகம்...

நான் சுகம்...

வாழ்தல் சுகம்...

இவ்வுலகம் சுகம்...

ஏகம் சுகம்...

பயணம்...

2008-08-26T20:05:00.003+05:30

மழையோடு...
மழையில்...
மழையாய்...

ஒரு மாய நொடியில்...

2008-08-23T18:55:00.006+05:30

அது ஒரு ஞாயிற்றுக் கிழமை...

வைகறை வானத்தின் வண்ணத் தீற்றல்களின் வழியாக சூரியன் உதிக்கத் தொடங்கிய நேரம்... மொட்டுக்களாய் இருந்த பூக்கள் கதிர்கள் வழியாக வானத்தின் வண்ணங்களை வகை வகையான பூக்களில் தீட்டின... வண்ண வண்ணப் பூக்கள் பூக்கத் தொடங்கிய அந்த காலை நேரத்தில் தென்றல் தவழ்ந்து வர வண்ணத்துப் பூச்சிகள் தன் வண்ணச் சிறகு விரித்து மலர்ந்த மலரினில் தேன் குடித்தன... சில்லென்ற காற்று வீசத் தொடங்கிய பொழுது இலைகளுக்கெல்லாம் சிறகு முளைத்தன... விடியலின் அழகில் பூமி சொக்கி நிற்க எங்கிருந்தோ வந்தன மழை மேகங்கள்... கருத்த மேகங்கள் வெளிச்சத்தை ஒரு மாய நொடியில் மின்னலாய் மாற்றியது...

சட்டென்று இடி இடிக்க பூக்கள் அதிர்ந்த அந்தப் பொழுதில் மழை பெய்யத் தொடங்கியது...

இன்னும் பெய்து கொண்டிருக்கிறது மழை....

முத்தம்...

2008-08-21T20:26:00.003+05:30

மண்ணை
முத்தமிட்டுக் கொண்டே
இருக்கிறது
மழை...

மழை தேவதை...

2008-08-19T23:30:00.007+05:30

பயணம் செய்வது எனக்கு மிகவும் பிடித்தமான ஒன்று...அதுவும் ரயில் பயணம், ஜன்னல் ஓரம் என்றால் கேட்கவே வேண்டாம் எனது மகிழ்ச்சிக்கு...

பயணத்தில் மழை என்றால் என் உற்சாகத்திற்கு எல்லையே கிடையாது... அப்படித்தான் அன்றும் என் பயணத்தில் மழை பெய்தது... ஜன்னலுக்கு வெளியே கைகளை நீட்டி மழையில் விளையாடிக் கொண்டிருந்தேன்...

மழை எழுப்புவது மண் வாசம் மட்டுமல்ல மன வாசத்தையும் கூட...

என்னைப் போலவே ஒரு பெண்ணும் தன் கைகளை நீட்டி மழையோடு மழையானாள்...

அவள் கை வளைகளின் சிணுங்கல்களை ரசிக்க எங்கிருந்து தான் வந்ததோ இடியும் மின்னலும்...

கரு மேகம் போன்ற அவள் கூந்தலின் ஒரு கற்றை முடி நெற்றியில் படர விழுந்தது மழையருவி அவள் தாமரைக் கன்னங்களில்...

தேங்கிய மழை நீரில் விளையாடிக் கொண்டிருந்தன அவளின் மீன் கண்கள்...

பறவைகளின் சிறகுகளைப் போல தன் கைகளை அசைத்து ஒரு "மழை" தேவதையாய் காட்சியளித்தாள்...

நானும் நனைவதைப் பார்த்து மழை நனைத்த பூவிதழாள் புன்னகைத்தாள்...

ரயிலிலும் பயணம் செய்கிறார்கள் தேவதைகள்...

பார்வை...

2008-08-19T23:07:00.006+05:30

பட்டுத் தெறிக்கும்
பார்வையில்
மீளவும் முடியாமல்
நோக்கவும் முடியாமல்
தவிப்பில்
கண்கள்...

காற்றும் நினைவும்...

2008-08-19T22:49:00.004+05:30

தொட்டுச் செல்லும்
காற்று
விட்டுச் செல்கிறது
உன் நினைவுகளை...

பெரு மழைக் காலத்தில் ஒரு வாகை மரத்தடியில்...

2008-08-13T10:28:00.018+05:30

ஒரு இலையுதிர் காலத்தின் மஞ்சள் மாலைப் பொழுது...

பரந்து விரிந்து நிழல் பரப்பிய வாகை மரத்தின் ஒரு கிளையில் அமர்ந்து புதிய புதிய பாடல்கள் இசைத்தபடி தளிர் விடும் இலைகளை வரவேற்று பாடிக்கொண்டிருந்தது ஒரு கருங்குயில்...

மரத்தினடியில் இருந்த கல் இருக்கையில் நட்சத்திரம் இல்லா வானத்தின் பிறை நிலா போல அமர்ந்திருந்தேன்...

பொன்னால் மெழுகியது போன்று சருகுகள் உதிர்ந்து மரத்தினடியில் கிடந்தன.

தெற்கு நோக்கிச் செல்லும் விரைவு ரயில் , ரயில் நிலையத்தைக் கடந்து சென்ற பின்பும் தனது இசை மழையை தொடர்ந்து கொண்டிருந்தது அந்தக் கருங்குயில்...

ரயிலோசையும் குயிலோசையும் என்னை வேறு எதிலும் கவனம் செலுத்த விடவில்லை...

படிக்க எடுத்து வந்திருந்த பாரதியின் கவிதைகளை அதன் பக்கங்களை புரட்டிப் புரட்டி காற்று படித்துக் கொண்டிருந்தது...

நான் அதன் வாசக அனுபவத்தை தடை செய்ய விரும்பவில்லை...

ஊர்க்குருவிகள் கிளைகளெங்கும் நடந்து பறந்து விளையாடிக் கொண்டிருந்தன...

இரை தேடிச் சென்ற ஒரு காக்கை கூடடைய பறந்து வந்தது. அலகினால் கவ்வி வந்த இரைகளை அப்பா காக்கை அம்மா காக்கையிடம் கொடுக்க அம்மா காக்கை கூட்டில் இருந்த குஞ்சுக் காக்கைகளை கொஞ்சிக் கெஞ்சி உணவு கொடுத்தது...

பக்கத்துக் கிளையில் குடியிருந்த மைனாக்கள் தங்களது கூட்டை செப்பம் செய்து கொண்டிருந்தன...

மடியில் படுத்துறங்கும் குழந்தையை தலை கோதும் தாயைப் போல பசும் இலைகளால் சாமரம் வீசிக் கொண்டிருந்தது வாகை மரம்...

தாய்மையும் தோழமையும் நம்மிடம் மட்டும் இல்லை...

இந்த உலகத்தில் உள்ள எல்லா உயிர்களிடத்தும் உண்டு...

தொடர் பயணத்தில் இருந்த மழை மேகங்களிடம் காற்று நலம் விசாரித்துக் கொண்டிருந்த ஒரு தருணத்தில் சில்லென்று மழைத் துளிகள் என்னில் பட்டுத் தெறித்தது...

நனையத் தொடங்கினோம் ஒற்றை இருக்கையும் நானும்...

பெருங் குடையாய் கூடடைந்த பறவைகளை காத்து நிற்கிறது வாகை... அந்த மரத்திற்கு தான் இந்தப் பறவைகளிடத்து எவ்வளவு வாஞ்சை... மரத்திடம் தான் இந்தப் பறவைகளுக்கு எத்துனை நேசம்...

பெரு மழை பெய்யத் தொடங்கியது...

எனக்கான வண்டி தூரத்தில் புள்ளியாய் வந்து கொண்டிருந்தது...

மழை மண்ணை இன்னும் ஈரமிக்கதாக்கிக் கொண்டிருந்தது...

தாய்மையையும் தோழமையையும் போல...

பூஞ்சிரிப்பு...

2008-08-10T23:21:00.005+05:30

வசந்த காலத்தின் ஒரு மாலைப் பொழுதில்
என் மேசை நாட்காட்டியில்
சிரித்துக் கொண்டிருந்த குழந்தைகளின்
சிரிப்பைக் கேட்டு அடம் பிடித்தன
தோட்டத்தில் இருந்த பசுஞ்செடிகள்...
அடம் பிடிக்கும் செடிகளுக்கு நீரூற்றத் தொடங்கிய
சில நாட்களுக்குப் பின் வந்த
ஒரு காலை நேரத்தில்
செடியெங்கும் பூத்துக்கிடந்தன
குழந்தைகளின் சிரிப்பு...

என் ஜன்னல் தோழி...

2008-08-10T23:05:00.007+05:30

எப்பொழுதும் கத்தியே தன் மகிழ்ச்சியை
வெளிப்படுத்துவான் பக்கத்து வீட்டுச் சிறுவன்
அன்றும் மழை நின்றவுடன் கத்தியபடியே
மாடிப் படிகளில் ஓடிக் குதித்து இறங்கினான்.
தீபாவளி விடுமுறையின் முதல் நாளின்
அழகிய மாலை நேரம்,
என் ஜன்னல் தோழியுடன் பேசிக்கொண்டிருந்தேன் .
மழையின் ஈரம் ஏறி இருந்தது சுவர்.
வெடிக்கத் தொடங்கின தீபாவளிக் கொண்டாட்டங்கள்
வட்டமடித்து பயந்து சிறகை விரிக்கத் திணறி
வானவில்லின் குறுக்கும் நெடுக்குமாய் பறந்து
காணாமல் போனாள் என் ஜன்னல் தோழி.
கொண்டாட்டங்கள் அடங்கிய

வாணவேடிக்கைகள் இல்லாத
விடுமுறையின் கடைசி நாளின் பின்னிரவில்
நகரத்துப் பறவைகள்

கூட்டம் கூட்டமாக பறந்து சென்றன.
என் ஜன்னல் தோழி இன்னும் வரவில்லை...

காதல்...சில குறிப்புகள்...சில நினைவுகள்...

2008-08-08T22:43:00.006+05:30

விழி பேசும்

மௌன மொழி - வெளிப்படுமே

இதயம் வழி...

வாடிய மலரெனினும்-நீ

சூடிய மலரிது...

யாருக்கும் புரியாத

என் கவிதை

உனக்குப் புரிந்தது.

உனக்குப் புரிந்ததால்

அனைவர்க்கும் புரிந்தது.

புரிந்தது

என் கவிதையல்ல!

நம் கவிதை...

மழை வாசம்

மண்ணோடு -என்

வாசம் உன்னோடு...

காத்திருத்தல் சுகம்

யாருமற்ற தனிமையில்

உனக்கான காத்திருப்பு

மிக சுகம்...

உன்னுடனான நினைவுகள் தான் எத்தனை அழகானது... உன் விரல் கோர்த்து மழையில் நனைந்த நாட்களும் ...என் தோள் சாய்ந்து சாயங்காலப் பொழுதுகளில் எனக்கு மட்டுமே கேட்கும் படியாக நீ பாடிய பாட்டுக்களும்...நம்மை கடந்து போகும் ஒவ்வொரு குழந்தையையும் தூக்கி கொஞ்சி முத்தமிட்டு என்னை காதலுடன் பார்க்கும் அந்த விழி நொடிகளும்...உனக்கு நான் எழுதிய கடிதங்களை என் மடியில் படுத்துக்கொண்டு மீண்டும் மீண்டும் வாசித்து ஒவ்வொரு வரியிலும் உன்னைப்பற்றி நான் எழுதியவைகளை சுட்டி "நிசமாவே என்னை பத்திதான் எழுதி இருக்கியா என " குழந்தையைப் போல கேள்வி கேட்கும் அந்த குறுஞ்சிரிப்பு நிமிடங்களும்...மணிக்கணக்கில் நமை மறந்து பேசிக் கொண்டிருந்த நிலாக் காலங்களும்...கனவில் நான் வந்ததை கதை போலச் சொல்லி என்னை இறுக கட்டிக் கொண்ட அந்த முதல் ஸ்பரிசமும் என நினைவுகளை மட்டுமே என்னிடம் விட்டு விட்டு எங்கேயடி போனாய் கள்ளி?

நினைவுகள் அழகெனினும்....

மணல் தொடும் அலையாய்...

2008-08-06T00:26:00.008+05:30

மேற்கு மலைத்தொடரின் அடிவாரத்தில் அமைந்துள்ள அந்த அழகிய கிராமத்தின் வயல் வெளிகளை ஒட்டியவாறு சிற்றோடையைப் போல நீண்டும் வளைந்தும் சென்ற ரயில் பாதையில் காது வைத்து ரயிலின் சத்தத்தை கேட்டுக்கொண்டிருந்த பள்ளிக்கூட சிறுவர்களை பார்த்தவுடன் எனது இளம் பருவத்து நினைவுகள் சிறகு விரித்துப் பறக்கத் தொடங்கின...

எவ்வளவு இனிமையான நாட்கள் அவை...

பள்ளி விட்டு வீடு திரும்புகையில் நண்பர்களுடன் மழையில் உடைப்பெடுத்து ஓடும் வாய்க்காலில் மீன் பிடித்து அதை பத்திரமாக ஒரு நெகிழிப்பையில் தண்ணீர் நிரப்பி வீட்டிற்கு கொண்டு வந்து கண்ணாடிக் குடுவையில் வளர்த்து அதற்கு உணவாக மண்புழு பிடித்து அதன் வளர்ச்சியை அழகை ரசித்து ஒவ்வொரு நாளும் வீடு திரும்பும் பொழுது புத்தகப் பையை வைத்து விட்டு சிறிது நேரம் அந்த மீன்களுடன் அன்று பள்ளியில் நடந்த நிகழ்வுகளை அம்மா கொடுக்கும் நொறுக்குத் தீனிகளை தின்று கொண்டு காப்பி குடித்தவாறு கதைத்து கொண்டிருந்த காலங்கள் அதியற்புதமானவை...

அப்பா அன்று புதிதாக வாங்கி வந்த பென்சில் திருகையில் இருந்து பென்சிலை கூர்படுத்தும் பொழுது அழகிய வடிவில் வெளிவரும் மரச்சுருளை பத்திரப்படுத்திய நாட்கள் முதற்கொண்டு மயிலிறகு குட்டி போடும் என காத்திருந்த நாட்கள் வரை பால்யத்தின் சுவடுகள் இன்னும் நினைவலைகளாய் மனத்திற்குள் மணல் தொடும் அலையாய் வந்து போகின்றன...

இன்னும் எழுதுவேன் பால்யத்தின் பக்கங்களை...

காத்திருங்கள்...

பூ மனம்...

2008-08-06T00:23:00.002+05:30

பூவைப் போல் தான்
மனமும்
வாசமிக்கதும்
வாடக்கூடியதும்...

பயணத்தில் புத்தன்...

2008-08-04T03:41:00.003+05:30

நதியில் மூழ்கியவன்
முத்தெடுப்பதில்லை
கடலில் நீந்தியவன்
கரை சேர்வதில்லை
பயணத்தில் புத்தனாகிறேன்...

நினைவுகள்...

2008-08-04T03:38:00.002+05:30

நதிகளில்
விளையாடிக் கொண்டிருக்கிறது
காற்று
மனதில்
நினைவுகளைப் போல..

வாழ்க்கை...

2008-08-04T03:36:00.003+05:30

நீரலைகளில்
துடுப்பசைத்து
மிதந்து செல்லும்
சிறு படகென
நகர்கிறது வாழ்க்கை
அழகாக...

மழையில் நனையும் ஒற்றைப் பனை...

2008-08-04T03:27:00.004+05:30

சிறகசைத்துப் பறக்கும்
வண்ணத்துப் பூச்சி
சிரித்து மலர்ந்த
செந்தாமரைப் பூ
மழையில் நனையும்
ஒற்றைப் பனை
நீயும் நானும்
அழகாய்த்தான் இருக்கிறது
இந்த உலகம்...

யாழ் மீட்டிய மழையின் இசை...

2008-08-04T03:24:00.004+05:30

வெகு நாட்களுக்கு முன்
நான் தொலைத்தவைகளை
மீட்டுத் தருகிறது மழை
என் யாழின்
நரம்புகளில் இருந்து
பரவுகிறது
மழையின் இசை...

காற்று என் மனசறியும்...

2008-08-04T03:22:00.003+05:30

அந்தச் செடியிடம்
பூ பூக்கச் சொன்னது
காற்று
பூத்தது பூ
வாசத்துடன்
காற்று
என் மனசறியும்...

பூ பூக்கும் நேரம்...

2008-08-04T03:19:00.005+05:30

கண் சிமிட்டிய கணத்தில்
பூத்தது பூ.
காத்துக் கிடக்கும்
அத்தனை நாட்களிலும்
கண் சிமிட்டும் நேரத்தில்
பூத்து விடும் பூ
கண் சிமிட்டும் நேரம் தான்
பூ பூக்கும் நேரம்.

நிறம் கொள்ளும் நினைவுகள்...

2008-08-04T03:09:00.004+05:30

மெல்ல வீசுகிறது குளிர் காற்று
துளிர்த்த இலைகள் நிறம் கொள்கின்றன
பூக்களின் வாசனை பரவுகிறது எங்கும்
சிறகு விரிக்கின்றன பறவைகள்
மழையாய் எழுகின்றன நினைவுகள்...

தோழமை...

2008-08-04T03:05:00.004+05:30

உதிர்ந்த போதும்
காற்றோடு பேசிக்கொண்டிருக்கும்
இலை.
பிரிந்தபோதும்
மனசோடு பேசிக்கொண்டிருக்கும்
தோழமை...

மல்லிகை மழை...

2008-08-04T03:03:00.004+05:30

மல்லிகையின்
வெள்ளைப் பூவிதழ்களில்
இருந்து பரவுகிறது
வாசனை.
மனசெங்கும்
நினைவின் மழை...

வலி...

2008-08-04T03:01:00.002+05:30

பிரிவின் துயரம்
மனசெங்கும்
வலிகள் மட்டுமே
பழக்கமாகின்றன...

தங்க நிறப் பறவை...

2008-08-04T02:58:00.004+05:30

கூடடைந்த பறவைகள்
உதயத்தின் ஒரு பொழுதில்
வான் வெளியில்
பறந்த பொழுது
கதிரொளி
சிறகுகளின் வழி
ஊடுருவிச் சென்றது.
தங்க நிறப் பறவைகள்
வானில் கண்டேன்...

பயணம் செய்யும் மேகம்...

2008-08-02T22:29:00.009+05:30

நான் பயணம் செய்யும் மேகம்
எனது பயணம்
மேகம் பொழியும் மழை

இசைக்குறிப்புகள்...

2008-08-02T11:57:00.004+05:30

கடந்து போன
நாட்களில் தொலைத்த
இசைக் குறிப்புகளை
பாடிக் காட்டுகிறது
அந்தக் குயில்...

தவிக்கும் கொடியில் பூக்கும் பூ...

2008-08-02T11:53:00.006+05:30

கொழு கொம்பின்றி
தவித்துக் கொண்டிருக்கும்
மல்லிகைக் கொடியிலும்
பூத்துக்கொண்டிருக்கிறது
பூ...

அழகாய்த்தான் இருக்கிறது...

2008-08-02T11:47:00.004+05:30

பெரு மரங்கள் அடர்ந்த சாலையில்
தொடரும் பயணத்தில்
கடந்து சென்ற கிராமத்தின்
காவல் தெய்வம் பயமுறுத்தினாலும்
அழகாய்த்தான் இருக்கிறது...

தடம் பதித்த மழை...

2008-08-02T11:42:00.005+05:30

அடர்ந்த காட்டில்
நீண்டு செல்லும்
ஒற்றையடிப் பாதையில்
தடம் பதித்து
மலையேறிச் சென்ற நாளில்
பெய்த மழை வேண்டும்
இன்றெனக்கு...

புரிதல்கள்...

2008-08-02T11:36:00.005+05:30

புரிதல்கள்
பிழையான பொழுது
என்
சம்மதம் இல்லாமலே
நான்
வேறொருவன் ஆகிறேன்...

வெளிச்சப்பூக்கள்...

2008-08-02T11:32:00.005+05:30

மெல்லப் பரவியது
வெளிச்சம்
வானத்தில் இருந்த நட்சத்திரங்கள்
மண்ணில் பூக்கத் தொடங்கின
பூக்களாக....

நியான் விளக்குகளும் வானத்து நட்சத்திரங்களும்...

2008-08-02T11:28:00.004+05:30

நியான் விளக்குகள்
மின்னும்
நகரத்து சாலையெங்கும்
நடந்து போய்க்கொண்டு இருக்கிறார்கள்
மனிதர்கள்.
வானத்து நட்சத்திரங்களை
மறந்தவர்களாய்...

தூர தேசத்துப் பறவைகள்...

2008-08-02T11:26:00.003+05:30

கடந்து செல்கின்றன
மழை மேகங்கள்
அதில்
நீரருந்திச் செல்கின்றன
தூர தேசத்துப் பறவைகள்...

கொக்குகளும் மீன்களும்...

2008-08-02T11:23:00.004+05:30

வெள்ளைக் கொக்குகள்
பறக்கும் அந்தக் குளத்தில்
மீன்களும் உண்டு.
கொக்குகள் பறந்து கொண்டுதான் இருக்கும்.
மீன்கள் நீந்திக் கொண்டு தான் இருக்கும்.

வெயில் மழையாய்...

2008-08-02T11:20:00.004+05:30

வெயில் பெய்தது
மழை அடித்தது
வெயில் மழையாய்
நினைவலைகள்.
நகர்கிறது பொழுது...

பற்றிப் படர...

2008-08-02T11:18:00.004+05:30

பற்றிப் படர பிடி தேடி
காற்றில் அசைகிறது
அந்த இளங்கொடி
மனசெங்கும் தவிப்பு...

மனசு...

2008-08-02T11:14:00.004+05:30

நினைவுகளுக்குத்
தெரிவதில்லை
மனசின் மனசு...

சொல்லுக்குள்...

2008-08-02T11:12:00.003+05:30

சொல்லுக்குள் அடங்காது
உள்ளுக்குள் அடங்கும்
உணர்வுகள்
கருமேகத்தின் நீர்த்துளிகள்
பெய்யட்டும் மழை...

காற்றில்...

2008-08-02T11:08:00.004+05:30

காற்றில் கலந்துவிட்டன
எழுத நினைத்தவை
பூ வாசமோ மண் வாசமோ
எதோ ஒன்று
உனக்குச் சொல்லும்
காற்றில் கலந்ததை...

காற்றின் மௌனம்

2008-08-02T11:05:00.005+05:30

காற்றின் மௌனம்
காணாமல் போனது - அந்த
தேன் சிட்டுக் குருவி கத்திய பொழுது...
மௌனம் இசையானது...

மஞ்சள் நிறப் பூவும் புத்தரின் புன்னகையும்...

2008-08-02T10:45:00.013+05:30

என் புத்தக அடுக்கில் தியானத்தில் இருந்த புத்தரின் புன்னகையைப் போல அந்த மஞ்சள் நிறப் பூ பூத்திருந்தது. அந்தப் பூவின் பெயர் என்னவென்று தெரியவில்லை. யாரிடமும் கேட்டுத் தெரிந்துகொள்ள மனமும் இல்லை. அதன் அழகில் லயித்திருந்தேன். அதன் மெல்லிய கோடுகளை என் கைகளால் தடவிப் பார்த்தேன்.

புத்தரைப் போலவே இந்தப் பூவும் என்னை வசீகரித்ததில் வியப்பொன்றும் இல்லை.

பூவில் புத்தரின் புன்னகை கண்ட அந்த புலர் காலை நேரத்தில் பூஞ் செடியினை அனைத்து இறுகப் பற்றியிருந்த மண்ணின் அடர் வண்ணத்தின் மேலே தேங்கியிருந்த தெளிந்த நீரில் தவழ்ந்து சென்றது வெண்மேகம்.

சின்னஞ் சிறு வயதில் தோளில் புத்தகப் பையை சுமந்து சென்ற நாட்களில் ராஜகுமாரனாகவும் இளவரசியாகவும் பிடரி மயிர் புரள விரையும் வெண் குதிரையாகவும் மந்திரவாதியாகவும் கிளியாகவும் அரக்கனாகவும் யானையாகவும் கதை சொல்லிய மேகங்கள் இன்று இந்த மஞ்சள் நிறப் பூவை ரசித்துக்கொண்டிருந்த பொழுதில் ஒரு புஷ்பக விமானத்தைப் போல தோன்றியது.

மங்கள தேவி மலையில் ஒரு வேப்பமரத்தடியில் நின்று கொண்டிருந்த கண்ணகியை அழைத்துச் சென்ற புஷ்பக விமானமாக கூட இது இருக்கலாம் என்ற நினைப்பில் வானத்தை நோக்கிய பொழுது அங்கே கையில் சிலம்புடன் நின்று கொண்டிருந்தாள் கண்ணகி "மேகங்களில்" ....

நான் கதை சொல்லத் தொடங்கி விட்டேன்...

கேட்பதற்கு நீ இருக்கிறாய் அல்லவா?